четверг, 11 июня 2015 г.

Քահանայի կատուն



Կատուն, որի անունը ոչ ոք չգիտեր, անհասկանալի գույնի կատու էր՝ գազարագույն ու սև աչքերով:
Մի ժամանակ ապրում էր ողորմածիկ Արեգնազի տան նկուղում, բայց երբ տիրուհին մահացավ, երբ չգիտես թե որտեղից հայտնվեցին բազմաթիվ ազգականներ ու հոգեհանգստի սեղանից սկսվեցին տան հանդեպ ունեցած վեճերը՝ ազգակցական առաջին երկրորդ, երրորդ կարգի, կատուն հասկացավ, որ իրեն կամ դուրս են անելու կամ կամ էլ հանձնեն ինչ որ լաբորատորիայի:
Փախավ տանից ու հայտնվեց իր գույնի մի «Մոսկվիչ» ավտոմեքենայի մոտ՝ գյուղի միակ փոքրիկ եկեղեցու ետևի բակում:
Քահանան, որը ռեալ հավատացյալ էր, նկատել էր կատվին, որ գիշերները քնում էր մեքենայի մեջ, բայց չգիտես ինչու չէր խառնվում նրա կյանքին մինչև այն պահը, երբ մի օր կատուն փորձ արեց մտնել եկեղեցի:
Մտավ:
Այդ օրվանից սկսվեց նրանց՝ Աստծո կողմից տված երկու արարծների մտերմությունը:
Քահանան ուր որ գնար՝ թաղում, հարսանիք, կնունք կատուն ետևից գնում էր ու միշտ նստում քահանայի ծնկներին, երբ քահանան ինքը նստում էր:
Գյուղացիներին դուր չէր գալիս կատվի ներկայությունը, բայց ամեն անգամ լսում էին քահանայի միակ պատասխանը.
- Տիրոջ տվա՜ծն է, ինչպես տվեց այնպե՜ս էլ կվերցնի:

Մի հինգշաբթի օր էր, անհասկանալի ինչպես բոլոր հինգշաբթի օրերը, երբ եկեղեցու բակում, ծառից մի վիրավոր ճնճղուկ ընկավ գետնին:
Փորձ արեց թռչելու, չստացվեց, դա չվրիպեց բնածին որսորդի կարգավիճակով լույս աշխարհ եկած կատվին, որը մի ոստյունով փորձեց հասնել ու բռնել ճնճղուկին:
Ճնճղուկի հուսահատ վերջին փորձը պսակվեց ծառի ամենացածր ճյուղին հայտնվելը:
Կատուն էլ բարձրացավ ծառը, թռչակը մի ճյուղ էլ բարձրացավ, կատուն ետևից, հետո նորից մինչև համարյա ծառի կատարը, կատում էլ ետևից ու երբ թռչակն ընկավ ծառից,  կատուն մի այնպիսի վայնասուն բարձրացրեց, որ ձայնից քահանան դուրս եկավ եկեղեցուց ու հասկացավ, որ նա չի կարող իջնել:
Փորձ արեց բարձրանալու, բայց հասկացավ, որ անիմաստ է, ճյուղերը չեն դիմանա:
Կատվի աղիողորմ կանչերը եկեղեցու բակ հավաքեցին գյուղացիներին:
Ըստ հայկական ավանդական սովորությունների սկսվեց խորհուրդների տարափը:
- Տե՜ր Հայր, զանգերը խփի՛ր, վախից մի կերպ կիջնի:
- Քաղաքից հրշեջ մեքենա կանչենք, աստիճանով:
- Քարո՛վ խփենք, վախից կընկնի, կատուները չեն սատկում ընկնելուց:
- Մի երկար փայտ բերենք դեմ տանք ճյուղին, թո՛ղ իջնի:
- Չէ՜, անկյունը, փոքր կլինի, չի՛ կարող:
Կատուն շարունակում էր ականջ ծակող ձայով մլավելը:
- Տիրոջ տվա՜ծն է, ինչպես տվեց այնպե՜ս էլ կվերցնի:
Քահանան բարկացած նայեց վերջին խորհուրդ տվողին, որը դեմքը թաքցրեց մեկ ուրիշի մեջքով:
- Հրե՜ն, Ենոքը գալիս է, մի բան կգտնի:
Ենոքը գյուղի ամենասրամիտ մարդն էր ու ամենաերկար բեղ ունեցողը:
Մոտեցավ, իր տեղն իմացողի լրջությամբ, առանց բարևելու, պտտվեց ծառի շուրջը, բեղի տակ մի հատ  «Հը՜մ»  արեց ու դարձավ քահանային:
- Պարան ունե՞ս, Տեր Հայր, - լուրջ դեմքով բարձր հարցրեց Ենոքը:
- Ի՞նչ անի, գնա կախվի՞, - սրամտեց մեկը ու շարժեց հավաքվածների ծիծաղը:
- Մեքենայում կա, որ ի՞նչ:
- Հանգույց ենք անում, գցում ճյուղին ու քաշո՜ւմ կպցնում գետնին, էլ ի՞նչ:
- Ա՛յ քեզ Ենո՜ք, դե՜ սրամիտն ուրիշ է, էլի՜:
- Հա էլի՜…
Քահանան վազեց դեպի իր «Մոսկվիչը»:

Եկեղեցու հարևանությամբ ապրում էր աշխարհագրության ուսուցչուհի, Արզումանի աստվածավախ այրի Երանուհին՝ իր չորս տարեկան Մարիամիկի հետ:
Բաց պատուհանից երևում էին հավաքված մարդիկ ու եկեղեցու բակում կատարվելիքը:
Անընդհատ խաչակնքելով Երանուհին ինչ որ բան էր շշնջում, երբ լսեց  երեխայի լացակումած ձայնը:
- Մա՜մ, ո՞վ է լաց լինում, արի՜:
Մայրը մոտեցավ, գրկեց երեխային ու նորից եկավ պատուհանի մոտ:
- Այ անիծվե՜ք դուք, անիծվե՜ք, բա՞ Աստծու տված արարածին կտանջեն այդպես, վա՜յ չունենամ ձեզ…
- Մա՜մ, ի՞նչու է լաց լինում փիսիկը, փիսիկ եմ ուզում, ա՜յ նրանից, որ լաց է լինում:
- Կունենաս Մարիամիկ ջան, կունենա՜ս, աղոթիր Աստծուն, ոնց ես եմ սովորեցրել ու քեզ Աստված կտա, հագնվի՜ր, մոտեցիր Ատվածամոր նկարին ու ինչպես որ սովորեցրել եմ, հիշո՞ւմ ես չէ:

Երրորդ փորձից Բուդաղյան Հրաչի փեսա Ավագին հաջողվեց պարանն իր հանգույցով գցել ճյուղի համապատասխան տեղը:
- Փա՜ռք Աստծո,- միաժանակ լսվեց հավաքվածներ ձայնը:
 Քահանան ու Բուդաղյան Հրաչի փեսա Ավագը սկսեցին քաշել պարանը:
Ճյուղն ընդամենը մի քսան սանտիմետր իջավ, իսկ կատվի ձայնն ավելի աղիողորմ դարձավ:
- Ա՛յ գեղացիք, ի՞նչ եք կանգնել, ձեռք գցեք:
Հինգ տղամարդով չկարողացան ճյուղը կախել ցած:
- Հը՞, Ենոք, հիմա ի՞նչ կասես:
- Տե՛ր հայր «Մոսկվիչը»  խոդ տո՛ւր, մոտեցրու, կապենք ավտոյից:
- Ա՜յ քեզ Ենոք, դե սրամիտն ուրիշ է էլի՜:
Երբ մեքենան մոտեցավ, գյուղի ավտոմեքենաներից ամենալավ գլուխ հանող, Թանաքուտողանց Պետրոսի ձեռքերով պարանը կապվեց մեքենայի ետևի մասից:
- Դե, ինչպես կասեր մեծն Գագարինը «Գնացի՜նք», մենակ թե Տեր Հայր, դանդա՜ղ, հավասարաչա՜փ, - Ենոքը գոհ, հպարտ  հայացքով նայեց հավաքվածներին:
Քահանան գլխով արեց ու մեքենան սկսեց շարժվել:
Ճյուղը սկսեց տեղի տալ ու դանդաղ սկսեց մոտենալ գետնին:
Ծափերի ձայնը խլացրեց կատվի խելահեղ մլավոցը:
Երբ մնացել էր մի երկու մետր ճյուղը գետնին հասնելու, պարանը կտրվեց…
Ճյուղը Գագարինի տիեզերք թռնելու սկզբնական արագությամբ վերադարձավ իր տեղն ու կատվին շպրտեց…

Կատուն օդում մի քանի պտույտ անելով աշխարհագրության ուսուցչուհի, Արզումանի աստվածավախ այրի Երանուհու պատուհանից ընկավ ներս…

Ս. Ումառ-Հարությունյան
12.06.15 թ.

Երևան  

Բարև՜ տղաս…



*
- Բարև տղա՜ս, բարև՜,
Կներես, որ այսպես ստացվեց,
Որ հիմա քո կողքին չեմ, գրկե՜մ, համբուրե՜մ:
Դու լա՞վ ես:
- Բարև, մա՛մ, լա՛վ եմ:
- Մի բան կերե՞լ ես:
- Այո՛, կերել եմ:
- Դպրոցում հո՞ չեն նեղացնում:
- Հայրիկից վախենում են:
- Հայրդ ի՞նչպես է, խորթ մա՞յրդ:
- Լա՛վ են, ի՞նչ կա:
- Կարոտե՜լ եմ, կերևա՞ս:
- Լավ մա՛մ, ժամանակ չկա՛…

*
- Բարև տղա՜ս, լա՞վ ես:
- Լա՛վ:
- Լսել եմ բժի՞շկ ես դառնալու,
Ինստիտուտում գործերդ լա՞վ են:
- Լա՛վ են,մամ:
- Հիվանդ չե՞ս, կարոտե՜լ եմ:
- Նորմա՛լ եմ, մամ:
- Հա՞յրդ
- Լա՛վ է, ի՞նչ կա:
 - Կարոտե՜լ եմ, կերևա՞ս:
- Լավ մա՛մ, ժամանակ չկա՛…

*
-
Բարև տղա՜ս, շնորհավորո՜ւմ եմ,
Ապրե՛ս, որ հորդ անունն ես դրել:
Շատ կցանկանայի գրկել առաջնեկիդ:
Առո՞ղջ է:
- Հա՛, մամ, նորմա՛լ:
- Կի՞նդ, հա՞յրդ:
- Լա՛վ են:
- Մի բան կերե՞լ ես:
Կարոտե՜լ եմ, կերևա՞ս:
-
Մա՛մ, աշխատանքի եմ, ժամանակ չկա՛:

*
Բարև սիրելի՜ս, գործերդ ի՞նչպես են,
Գիտե՜մ, դուստր ես ունեցել, աչքե՜րս քոռանան
Չտեսա թոռներիս:
Դու լա՞վ ես, այսօր մի բան կերե՞լ ես:
Այդպես էլ քեզ չտեսա,
Չսպասեցի,
Կներե՜ս…
- Բարև մա՜մ, չէ մի քիչ լավ չեմ, իսկ դու որտե՞ղ ես:
Ինձ Ների՜ր:
- Ե՞ս, ես երկնքում եմ արդեն,
Քեզ լա՜վ նայիր…

Ս.Ումառ-Հարությունյան



среда, 10 июня 2015 г.

Մայրիկ


Մի կնոջ հարցրեցին թե, ո՞ր երեխայիդ ես ամենաշատը սիրում.
Պատասխանեց.
- Նրա՛ն, ով հիվանդ է, քանի դեռ չի առողջացել,
Նրա՛ն, ով տանից դուրս է եկել և դեռ չի վերադարձել,
Ամենափոքրիկի՛ն, քանի դեռ չի մեծացել,
Եվ բոլորի՜ն, քանի դեռ  չեմ մահացել…

Մայրիկ

Մի պահ աշխարհը բերանն իր փակեց,
(Ինչ-որ բան փոխվեց մեծ տիեզերքում)
Չարակա՜մ, քինո՜տ աղմուկը սսսկվեց`

Մի մայր էր ծնկած աղոթում…

Բարակ մատները սեղմել էր իրար,
Ինչ-որ անուն էր շրթին մրմնջում,
Որդո՞ւ, ամուսնո՞ւ թե՞ դստեր համար -

Մի մայր էր ծնկած աղոթում…
     
… Ոչ լա՛ցն է հուզում, ոչ էլ ժպի՜տը,
Ո՛չ ամառ է, ո՛չ ձմեռ աշխարհում,
Երբ անհանգիստ է մայրական Սիրտը,

Երբ  մա՜յրն է ծնկած աղոթում…

… Մի՛ փնտրեք, չկա՛ն ուրիշ Աստվածներ,
Մեկն է Աստվածը՝ «Մայրի՜կ» անունով,
Մե՛կն է Հավատը ՝ Մայրական Ձեռքե՜ր,
Մեկ Սի՜րտ՝ քեզ համար բաբախող…

…Չկա՜, մի՛ փնտրեք դրախտ երկնքում,
Այստե՜ղ է Դրախտը՝ քո՛ կողքին,
Դրախտը - երբ գլուխդ ես դնում
Մայրական Հոգնած Ծնկներին:

Ս,Ումառ-Հարությունյան


воскресенье, 7 июня 2015 г.

Ամուսինների Շահագործման (օգտագործման) Հ Ր Ա Հ Ա Ն Գ ՄԱՍ 2



Ամուսին
Շատ նման է Երկիր մոլորակի վրա բնակվող բանական տղամարդ էակին:

Արտաքին տեսքին նայելիս, անմիջապես աչքի է զարնում երկարաժամկետ խնամքի պակասը:
Համադրվում է բնակարանի ցանկացած իրի հետ, բազկաթոռ, բազմոց, հեռուստացույց…
Հիմնական գոյության վիճակը հորիզոնական է:

Շահագործում

1. Կերակրել օրը 3 անգամ

2. Պահպանել ցանկացած հարվածներից, զգայացունց նորություններից, զրկել անձրևին երկար նայելու հնարավորությունից

3. Ամիսը մեկ անգամ ստիպողաբար տանել թատրոն կամ կինո

4. Վեց ամիսը մեկ, կանխարգելիչ նպատակներով պատժել, հյուր տանելով կնոջ ծնողների մոտ

5. Ամեն երեքշաբթի, ֆուտբոլ նայելու ռոմանտիկ սովորությունից ետ վարժեցնելու համար, կոնքատազով փակել հեռուստացույցի տեսանելիությունը, ձեռքերը բռունցք արած հենել կոնքերին ու հարցնել «Շաբաթ օրը կարող է դոլմա եփեմ, թփո՞վ ես ուզում թե՞ կաղամբով»

5.1 Պատասխանի չարժանանալու դեպքում, չարաճճի աչքերով հարցնել. «Միսը դո՞ւ կաղաս թե՞ հարևան Գառնիկին խնդրեմ»

6. Ամիսը երկու անգամ դատարկել գրպանները

7. Սովորեցնել գնալ խանութ, սկզբից թեթև առևտուր անելուն հետո կամաց-կամաց ավելի բարդ առևտրի, որպիսզի չփչանա արտաքին տեսքն ու հայացքը

8. Ամեն օր գիշերվա 23.30 րոպե ուշադիր ու երկար նայել աչքերին, լիցքավորելով նրան հարևանների կանանց չար աչքերից խուսափելու

9. Շաբաթը մեկ անգամ՝ շաբաթ կամ կիրակի օրերին լողացնել և պարտադիր ցույց տալ երեխաներին, փաղաքշական ասելով, որ
«Երեխանե՜ր, սա ձեր հայրի՜կն է»

10. Երաշխիքային ժամկետներում լիովին օգտագործելու համար, 3 ամիսը մեկ գնել վերնաշապիկ, 8 ամիսը մեկ կոշիկ:

11. Հիշել, որ նրա վերևի վերջույթները նախատեսված են լվացքի, հատակը լվանալու, պատին մեխ խփելու, տոնական օրերին ճաշ պատրաստելու համար

12. Չմոռանալ, որ նրա ներքևի վերջույթները անընդհատ քայլելու, վազելու համար են միայն այն պայմանով, որ դրամ աշխատեն

13. Նրան միշտ Թարմ ունենալու համար հարկավոր է ժամանակ առ ժամանակ ուտել ներվերը, հանել հավասարակշռությունից:
a) Նրա հարցին «Որտե՞ղ է արդուկված վերնաշապիկս» անթարթ աչքերով պատասխանել «Որտե՞ղ է»
b) Նրա հարցին «Վաղը ի՞նչ եմ հագնելու» ձեռքերը ծալել կրծքին ու անմեղ ձայնով պատասխանել «Ի՞նչ»
c) Նրա հարցին «Ինչո՞ւ աղբը չես թափել» պատասխանել «Ինչո՞ւ»   և

14. Կանգնեցնել նրան ուղղահայաց դիրքում, ձեռքը զգույշ, շատ զգույշ դնել աղբադույլի բռնակը, 16 ամյա երեխայի ձեռքից վերցնել Պլանշետը, GPS-ով նշել բնակարան- աղբամաններ ճանապարհը և թեթև ուսին շոյելով ասել
«Սիրելի՜ս, ժամանակ եմ պահել, դե՜ քե՛զ տեսնեմ»

ԸՍՏ ՀՐԱՀԱՆԳԻ ՇԱՀԱԳՈՐԾԵԼՈՒ ԴԵՊՈՒՄ ԱՄՈՒՍՆՈՒ ՕԳՏԱԳՈՐԾՄԱՆ ԵՐԱՇԽԻՔԱՅԻՆ ԺԱՄԱՆԱԿԸ ՀԱՍՆՈՒՄ Է ՄԻՉԵՎ 68 ՏԱՐՎԱ


Ս. Ումառ-Հարությունյան

Ամուսինների Շահագործման (օգտագործման) Հ Ր Ա Հ Ա Ն Գ ՄԱՍ 1



Կին
Երկիր մոլորակի վրա բնակվող բանական (?)  ԶԱԳՍ-ի (Զանազան Անախորժությունների Գրանցման Սեղան) կողմից  Լիցենզիա ունեցող էգ արարած, որը հիմնականում հանդես է գալիս իր լրացման՝ մայրիկի հետ միասին:

1. Ուշադրություն, լցված է հատուկ, անսպառ հեղուկով, որին արցունք է ասում և կարողանում է ցանկացած պարագայում առաջացնել համաշխարհային ջրհեղեղի տպավորություն:

2. Կամակոր է, անկառավարելի, շատ է սիրում իր բարձրակրունկի տակ հայտնված տղամարդկանց հասցնել անելանելի վիճակի:

3. Նշանակությունը (առաքելությունը)
ուղիղ հավասարաչափ, արագացող շարժման օրենքով դատարկել տղամարդու դրամապանակը և բանկային քարտը:

4. արձագանքում է իր անվան ցանկացած փաղաքշական ձևին

5. Անկանխատեսելի պայթյունավտանգ է՝ իր բոլոր ավերիչ հետևանքներով

6. Հասարակության մեջ նրա հայտնվելը առանց դնչկալի կարող է հանգեցնել անուղղելի հետևանքների

7. Տեսքը խելացնոր գեղեցիկ է, աֆրիկյան շատ ցեղեր նրան օգտագործում են որպես կոկորդիլոսներին ջրից ափ դուրս բերելու անփախարինելի խայծ

8. Սանրվածքի տակ գտնվող մասում, որը տղամարդկանց մոտ կոչվում է գլուխ, Բրոունյան շարժումով քաոսային վիճակ է

9. Ողնաշարից 4-5 սմ  ներքև գտնվում է նրա Աքիլլեսյան գարշապարը
Օգտագործելուց առաջ խորհուրդ է տրվում ափի թեթև նուրբ հարվածով
համոզվել տվյալ պահին պիտանելիության աստիճանը
Եթե արձագանքի «Վա՜յ, գործ եմ անում» - նշանակում է պատրաստ է
Եթե արձագանքի «Ապո՛ւշ, բան ու գործ չունե՞ս» - նշանակում է, որ պետք է նրանից գտնվել զգալի հեռավորության վրա

10. Իրեն համարում է թույլ արարած, չնայած կարողանում է նավաստիներին հատուկ ծովային բարդ հանգույցով կապել տղամարդու ոտքերն ու ձեռքերը

11. Ամուսնական պարտականությունները կատարել չցանկանալու դեպքում, ունի կայուն, համոզիչ վստահ պատասխան
«Գլուխս ցավո՜ւմ է»
12. Ամուսնու կողմից ամուսնական պարտականություններ չկատարելը որակավորում է ստանդարտ երկու բառով
«Անհոգի՜, սրիկա՛»

13. Ունի անթերի հոտառություն զգալու այլ, օտար կնոջ օծանելիքի բույրը

14. Ունի հոյակապ տեսողություն տղամարդու շորերի վրա անսխալ գտնելու 2-3 սմ երկարությամբ ցանկացած այլ կնոջ մազ

15. Բացարձակ չի զգում ժամանակը, ինչը հնարավորություն է տալիս իր հագնվելու ընթացքում update  անել համակարգչի Windows-7 ծրագիրը (3-4 ժամ)

ՊԻՏԱՆԻ Է ՕԳՏԱԳՈՐԾՄԱՆ (շահագործման) ՈՂՋ ԿՅԱՆՔԻ ԸՆԹԱՑՔՈՒՄ


Ս. Ումառ-Հարությունյան